Error message

  • Deprecated function: Methods with the same name as their class will not be constructors in a future version of PHP; views_display has a deprecated constructor in require_once() (line 3097 of /home/janashakthi/public_html/includes/bootstrap.inc).
  • Deprecated function: Methods with the same name as their class will not be constructors in a future version of PHP; views_many_to_one_helper has a deprecated constructor in require_once() (line 113 of /home/janashakthi/public_html/sites/all/modules/ctools/ctools.module).

ಅಮೆರಿಕ ಭಯೋತ್ಪಾದಕ ರಾಷ್ಟ್ರ ಲಾಸ್ ವೆಗಾಸ್ ಶೂಟ್‍ಔಟ್‍ನಿಂದ ಸಾಬೀತು

ಸಂಪುಟ: 
11
ಸಂಚಿಕೆ: 
44
date: 
Sunday, 22 October 2017
Image: 

 

ಲಾಸ್ ವೇಗಾಸ್ ಶೂಟೌಟ್ ನಿಂದಾಗಿ ಉದ್ಭವಗೊಂಡಿರುವ ಪ್ರಶ್ನೆಗಳಿಗೆ ಅಮೆರಿಕದ ಆಡಳಿತದಿಂದ ಸರಿಯಾದ ಉತ್ತರ ಮಾತ್ರ ಸಿಗುವುದಿಲ್ಲ. ಏಕೆಂದರೆ, ವಿದೇಶಗಳಲ್ಲಿ ಬೇಕಾಬಿಟ್ಟಿ ಮಿಲಿಟರಿ ದಾಳಿ ಮಾಡಿ ನಾಶ ಮಾಡುವ ಮಾನಸಿಕತೆ ಆ ದೇಶದ ಜನರನ್ನು ತಟ್ಟದೆ ಇದ್ದೀತೇ? ಅಮೆರಿಕದ ಆಕ್ರಮಣಗಳಿಗೆ ತುತ್ತಾದ ಹಲವು ರಾಷ್ಟ್ರಗಳು ನಮ್ಮ ಕಣ್ಮುಂದೆ ಇವೆ. ಗ್ರಾಮಗಳಲ್ಲಿನ ಜನರ ರಕ್ಷಣೆ ಮಾಡುವ ನೆಪದಲ್ಲಿ, ತಮ್ಮ ಸೈನಿಕರು ಕೊಂದ ಜನರ ಸಂಖ್ಯೆಗೆ ಲೆಕ್ಕವೇ ಇಲ್ಲವೆಂದು ಅದಕ್ಕೆ ಗೊತ್ತಿದೆ.

ಅಮೆರಿಕಾದ ಲಾಸ್ ವೆಗಾಸ್‍ನಲ್ಲಿ 64 ವರ್ಷದ ಏಕೈಕ ಬಂದೂಕು ದಾರಿ ಸ್ಟಿಫನ್ ಪ್ಯಾಡಾಕ್ ಸಾಮೂಹಿಕ ಗುಂಡಿನ ಮಳೆಗೈದ ಪರಿಣಾಮ 59 ಮಂದಿ ನಾಗರಿಕರು ಸಾವನ್ನಪ್ಪಿ 527 ಮಂದಿ ಗಾಯಗೊಂಡಿರುವುದು ಜಗತ್ತಿನಾದ್ಯಂತ ಅನೇಕ ಗಂಭೀರ ಪ್ರಶ್ನೆಗಳನ್ನು ಹುಟ್ಟು ಹಾಕಿದೆ.

ಸ್ಟಿಫನ್ ಪ್ಯಾಡಕ್‍ನನ್ನು-ಅಮೇರಿಕದ ಆಡಳಿತವಾಗಲಿ ಅಥವಾ ಅಲ್ಲಿನ ಪೊಲೀಸ್ ಆಗಲಿ ಇವನೊಬ್ಬ ಭಯೋತ್ಪಾದಕನೆಂದು ಪರಿಗಣಿಸದಿರುವುದು ಏಕೆ? ಅಮೆರಿಕದಲ್ಲಿ ನಡೆಯುವ ಬಂದೂಕು ದಾಳಿಯ ಹಿಂಸೆಗಳು ಪ್ರಪಂಚದ ಇನ್ನಿತರೆ ದೇಶಗಳಲ್ಲಿ ನಡೆಯುವ ದಾಳಿಗಳಿಗಿಂತ ತುಂಬ ಹೆಚ್ಚಾಗಿರುತ್ತವೆ ಏಕೆ? ಬೇರೆ ದೇಶಗಳಲ್ಲಿ ನಡೆಯುವ ಹಿಂಸೆಗಳಿಗೂ ಇದಕ್ಕೂ ಸಂಬಂಧವಿರಬಹುದೆ? ಅಥವಾ ಹಿಂಸಾಚಾರವನ್ನು ಬಂದೂಕು ಮೂಲಕ ಸುಲಭವಾಗಿ ನಡೆಸುವ ಸಲುವಾಗಿ ಉತ್ತೇಜಿಸುವ ಉದ್ದೇಶ ಹೊಂದಿರಬಹುದೆ? ಅಥವಾ ಅಂತರರಾಷ್ಟ್ರೀಯ ಸಮಸ್ಯೆಗಳನ್ನು `ಪರಿಹರಿಸುವ’ ನಿಟ್ಟಿನಲ್ಲಿ ಇದು ಅಮೆರಿಕದ ಹೊಸ ವಿಧಾನವಾಗಿರ ಬಹುದೆ? ಹೀಗೆ ಹತ್ತು ಹಲವು ಬಗೆಯ ಪ್ರಶ್ನೆಗಳು ಈ ದಾಳಿಯಿಂದ ಉದ್ಭವಗೊಂಡಿರುವುದಂತೂ ನಿಜ. ಭಯೋತ್ಪಾದಕತೆಯನ್ನು ಅಮೆರಿಕಾವೇ ಪೋಷಣೆ ಮಾಡುತ್ತಿರಬಹುದು ಎಂಬ ಅನುಮಾನ ಕಾಡುತ್ತಿರುವುದು ಅತಿಶಯೋಕ್ತಿಯಲ್ಲ.

ಬಿಳಿಯರು ಭಯೋತ್ಪಾದಕರಾಗಲೂ ಸಾಧ್ಯವಿಲ್ಲ !

ಅಮೆರಿಕದ ಪ್ರಕಾರ ಭಯೋತ್ಪಾದಕರು ಯಾರೆಂದು ನೋಡೋಣ. ಅಧ್ಯಕ್ಷ ಟ್ರಂಪ್‍ರಿಂದ ಮೊದಲುಗೊಂಡು, ಕೆಳಗಿನ ಯಾವುದೇ ಬಿಳಿಯ ವ್ಯಕ್ತಿಯನ್ನು ಭಯೋತಾದ್ಪಕನೆಂದು ಹೆಸರಿಸಲು ಅಮೆರಿಕ ಇಷ್ಟ ಪಡುವುದಿಲ್ಲ. ಅವನು ಒಬ್ಬ ವ್ಯಕ್ತಿಯಾಗಿ ಎಷ್ಟೇ ನರಹತ್ಯೆ ನಡೆಸಿದ್ದರೂ ಸಹ ಯಾವುದೇ ಶ್ವೇತ(ಬಿಳಿಯ) ಬಣ್ಣದ ಚರ್ಮದವನು ಮಾತ್ರ ಭಯೋತ್ಪಾದಕನಾಗಲು ಸಾಧ್ಯವೆ ಇಲ್ಲ. ಏಕೆಂದರೆ, ಅಲ್ಲಿನ ರಾಜಕೀಯ ನಂಬಿಕೆಗಳ ವಿರುದ್ಧ ಬಿಳಿಯರು ವರ್ತಿಸುವುದಿಲ್ಲ, ಹಾಗೇನಾದರೂ ವರ್ತಿಸಿದ್ದರೆ ಅಂತಹವರು ಮಾನಸಿಕವಾಗಿ ತೊಂದರೆಗೊಳಗಾಗಿರಬೇಕು. ಯಾವುದೇ ರೀತಿಯ ಹಿಂಸಾಚಾರ - ನರಹತ್ಯೆ ಮಾಡಿದಾಗ್ಯೂ ಆರೋಪಿಯೆಂದು ಪರಿಗಣಿಸುವ ಪದ್ಧತಿ ಅಮೆರಿಕದಲ್ಲಿ ಇಲ್ಲವೆಂದು, ಈ ಪ್ರಕರಣವು ಕೂಡ ಸಾಬೀತು ಪಡಿಸಿದೆ. ಈ ಹಿಂದೆಯೂ ಸಹ ಒಬ್ಬ ಬಿಳಿಯರ “ಪರಮಾಧಿಕಾರಗಳಲ್ಲಿ” ನಂಬಿಕೆಗಳನ್ನು ಹೊಂದಿದ್ದ ವ್ಯಕ್ತಿ, ದಕ್ಷಿಣ ಕರೊಲಿನಾದ ಚಾಲ್ರ್ಸ್‍ಟಾನ್ ನಲ್ಲಿನ ಕರಿಯ ಚರ್ಚ್ ನೊಳಗೆ ನುಗ್ಗಿ 12 ಜನರ ಮೇಲೆ ಗುಂಡು ಹಾರಿಸಿ, 9 ಜನರನ್ನು ಕೊಂದಾಗಲೂ ಸಹ ಆತ ಭಯೋತ್ಪಾದಕನಲ್ಲವೆಂದು ಬಿಟ್ಟಿದ್ದರು. ಇಂತಹ ಹಲವು ಘಟನೆಗಳನ್ನು ಉದಾಹರಣೆ ಕೊಡಬಹುದು.

ಹತ್ಯೆ ಮಾಡಿದವನು ಮುಸ್ಲಿಮನಾಗಿದ್ದರೆ ಮಾನಸಿಕವಾಗಿ ನಿಜವಾಗಲೂ ತೊಂದರೆಗೀಡಾಗಿದ್ದರೂ ಅಥವಾ ಇಲ್ಲದಿದ್ದರೂ, ಹೆಸರನ್ನು ಆಧಾರಿಸಿ ಟ್ರಂಪ್ ನಿಂದ ಮೊದಲುಗೊಂಡು ಎಲ್ಲಾ ಮಾಧ್ಯಮದವರೂ ಮುಲಾಜಿಲ್ಲದೆ ತಕ್ಷಣ ಅವನ್ನೊಬ್ಬ `ಮುಸ್ಲಿಂ-ಭಯೋತ್ಪಾದಕ’ ನೆಂದು ಪರಿಗಣಿಸುತ್ತಿದ್ದರು. ಅಂದರೆ, ಸಾಮೂಹಿಕ ಹಿಂಸಾಚಾರ ಅಥವಾ ಬಂದೂಕು ದಾರಿಯೊಬ್ಬ ಬಿಳಿಯನಲ್ಲದಿದ್ದರೆ ಮಾತ್ರ ಅಮೆರಿಕದಲ್ಲಿ `ಭಯೋತ್ಪಾದಕ’. ಇಲ್ಲದಿದ್ದರೆ ಮಾನಸಿಕ ರೋಗಿ ಅಥವಾ ನಿರ್ಧೊಷಿ?

ಮುಸ್ಲಿಂ-ದೇಶಗಳ ಮೇಲೆ ದಾಳಿಗೆ ಇಸ್ಲಾಂ-ಭೀತಿಯ ಭೂತ?

ಶೌನ್ ಕಿಂಗ್ 03 ಅಕ್ಟೋಬರ್ 2017 ರಂದು “ಇಂಟರ್ ಸೆಪ್ಟ್” ಎಂಬ ಪತ್ರಿಕೆಯ ಲೇಖನದಲ್ಲಿ “ದಿ ವೈಟ್ ಪ್ರಿವಿಲೇಜ್ ಆಫ್ ದಿ ಲೋನ್ ವೊಲ್ಫ್ ಶೂಟರ್”, ಬರೆಯುತ್ತಾ “ನಾವು ಏನನ್ನು ನೋಡುತ್ತಿದ್ದೇವೆ ಎಂಬುದು ಅಕ್ಷರಶಃ ಸತ್ಯ. ಸಾಮೂಹಿಕ ಕೊಲೆಗಡುಕ ಸ್ಟಿಪನ್ ಪ್ಯಾಡಾಕ್ ನನ್ನೂ ಭಯೋತ್ಪಾದಕನೆಂದು ಕರೆಯುವುದು ಅಮೆರಿಕದ ಆಡಳಿತಕ್ಕೆ ಇಷ್ಟವಿಲ್ಲದಿರುವುದು ಅಮೇರಿಕದ ಇಬ್ಬಂದಿತನದ ನೀತಿ. ಬೇರೆ ಯಾರೇ ಆದರೂ ಇಂತಹ ಕೃತ್ಯವೆಸಗಿದ್ದರೆ, ಸಾರ್ವಜನಿಕರ ಕೋಪ-ತಾಪಕ್ಕೆ ತುತ್ತಾಗುತ್ತಿದ್ದರು. ಇದರಿಂದಾಗಿ, ಇಷ್ಟೊಂದು ಬಿಳಿಯರು ಸಾಮೂಹಿಕ ಹತ್ಯೆಗಳಲ್ಲಿ ಏಕೆ ತೊಡಗಿದ್ದಾರೆ ಎಂದು ಕೇಳಲು ಮತ್ತು ಆ ಬಗ್ಗೆ ಪ್ರಾಮಾಣಿಕ ಚರ್ಚೆ ಮಾಡಲು ನಮ್ಮ ಸಮಾಜಕ್ಕೆ ಸಾಧ್ಯವಾಗುತ್ತಿಲ್ಲ” ಎಂದು ಹೇಳಿದ್ದಾರೆ.

ಬಿಳಿಯರಲ್ಲದವರ ಮೇಲೆ, ನಿರ್ದಿಷ್ಟವಾಗಿ ಇಸ್ಲಾಂ-ಭೀತಿಯ ಭೂತದ ಆಧಾರದಲ್ಲಿ ಬಣ್ಣಗಳ ಆಧಾರದಲ್ಲಿ ಭಯೋತ್ಪಾದಕರೆಂದು ಹೆಸರಿಸುವುದು ಅಮೆರಿಕದ ಆಡಳಿತದ ಸರ್ವೇ ಸಾಮಾನ್ಯ ನೀತಿಯಾಗಿದೆ. ಇದನ್ನು ಬಳಸಿ ಮುಸ್ಲಿಂ ಬಹುಸಂಖ್ಯಾತ ದೇಶಗಳ ಮೇಲೆ ದಾಳಿ ಮಾಡುವುದು ಸುಲಭವಾಗಿಸಲು ಹೀಗೆ ಮಾಡಲಾಗುತ್ತಿದೆಯೇ? ಇಸ್ಲಾಂ-ಭೀತಿಯ ಇಂತಹ ಆಕ್ರಮಣಕಾರಿ ನೀತಿಗಳಿಗೆ ಅಮೆರಿಕದ ಬಿಳಿಯ ನಾಗರಿಕರ ಬೆಂಬಲ ಸುಲಭವಾಗಿಸುತ್ತದೆಯೇ? ಎಂದು ಜಗತ್ತಿನ ಇತರೆ ದೇಶಗಳ ನಾಗರಿಕರಿಗೆ ಕಾಡುತ್ತಿರುವ ಪ್ರಶ್ನೆ.

ಇಸ್ಲಾಮಿಕ್ ಸ್ಟೇಟ್ ಭಯೋತ್ಪಾದಕರನ್ನು ಪೂರ್ಣವಾಗಿ ನಾಶ ಮಾಡುವ ಹೆಸರಲ್ಲಿ ಅಮೆರಿಕದ ಮಿಲಿಟರಿ ಈಗ ಯುದ್ಧವನ್ನು ಸಿರಿಯಾಕ್ಕೆ ವಿಸ್ತರಿಸಿದೆ. ಇದು ಇರಾಕ್ ಯುದ್ಧದ ಮೂರನೇ ಮತ್ತು ಮಧ್ಯಪ್ರಾಚ್ಯ ಯುದ್ಧದ 12ನೇ ಆವೃತ್ತಿ. 1980ರ ನಂತರ ಸಿರಿಯಾ ವಿವಿಧ ನೆಪಗಳಲ್ಲಿ ಅಮೆರಿಕನ್ ದಾಳಿಗೆ ಗುರಿಯಾಗುತ್ತಿರುವ 12ನೇ ಮುಸ್ಲಿಂ ದೇಶ ಎಂಬುದು ಇದರರ್ಥ, ಎಂದು ಇತ್ತೀಚೆಗೆ ಅಮೆರಿಕದ ಮಿಲಿಟರಿ ಇತಿಹಾಸಕಾರೊಬ್ಬರು ಲೇಖನವೊಂದರಲ್ಲಿ ಹೇಳುತ್ತಾರೆ. ಇದು ಮತ್ತು ಮೇಲೆ ಹೇಳಿದ ಪ್ರಶ್ನೆಗಳನ್ನು ಒಟ್ಟಿಗೆ ಇಟ್ಟು ನೋಡಿದರೆ ಇಸ್ಲಾಂ-ಭೀತಿಯ ಭೂತವನ್ನು ಅಮೆರಿಕನ್ ಸರಕಾರ ತನ್ನ ಮಿಲಿಟರಿ-ವಿದೇಶಾಂಗ ನೀತಿಗೆ ಜನರ ಬೆಂಬಲ ಪಡೆಯಲು ಬಳಸುತ್ತಿದೆಯೇ ಎಂಬ ಬಲವಾದ ಅನುಮಾನಕ್ಕೆ ಕಾರಣವಾಗುತ್ತದೆ.

ಶೂಟೌಟ್ ರಾಜಕೀಯ ಹುನ್ನಾರವೆ?

ಶೂಟೌಟ್ ಹಿಂಸಾಚಾರದ ಬಗ್ಗೆ ನಾವು ಆಗಾಗ ಕೇಳಿದರೂ, ಶೂಟೌಟ್ ಹಿಂಸಾಚಾರದ ಸಮಸ್ಯೆಯ ಆಳ-ಅಗಲಗಳ ಬಗ್ಗೆ ಮತ್ತು ಗನ್ ವಿವಾದದ ಬಗ್ಗೆ ಕೇಳುವುದಿಲ್ಲ. ಅಥವಾ ಇದಕ್ಕೆ ಸಂಭಂಧಪಟ್ಟ ರಾಜಕೀಯ ವಾಗ್ವಾದಗಳ ಬಗ್ಗೆ ಕೇಳುವುದಿಲ್ಲ. ಮಿಲಿಟರಿ ಗ್ರೇಡ್ ಶಸ್ತ್ರಗಳೂ ಸೇರಿದಂತೆ ಗನ್ ಹೊಂದುವ ಹಕ್ಕಿನ ಬಗ್ಗೆ ವಾದ ಮಾಡುವವರ ಜನಾಂಗೀಯ-ಉಗ್ರ ಬಲಪಂಥೀಯ ರಾಜಕೀಯ ನಂಬಿಕೆಗಳಿಗೂ ಅದಕ್ಕೆ ಇರುವ ಸಂಬಂಧಗಳ ಬಗ್ಗೆ ಕೇಳುವುದಿಲ್ಲ.

ಅಮೆರಿಕಾದಲ್ಲಿ ಶೂಟೌಟ್ ಹಿಂಸಾಚಾರಕ್ಕೇನು ಕಡಿಮೆ ಇಲ್ಲ. ಅಂಕಿ-ಅಂಶಗಳೇ ಇವುಗಳನ್ನು ಸಾಬೀತು ಪಡಿಸಬಲ್ಲವು. ಕಳೆದ ಒಂದು ವರ್ಷದಲ್ಲಿಯೇ ಸುಮಾರು 273 ಸಾಮೂಹಿಕ ಗುಂಡಿನ ದಾಳಿಗಳು ನಡೆದಿವೆ. ಸಾವಿನ ಸಂಖ್ಯೆ 11,754 ದಾಟಿವೆ ಎಂದು ಅಂದಾಜಿಸಲಾಗಿದೆ.

ಶೂಟೌಟ್ ಗೆ  ಒಂದು ಲಕ್ಷ ಜನರಲ್ಲಿ 10.2 ಜನ ಬಲಿಯಾಗುತ್ತಿದ್ದಾರೆ. ಇದು ಜರ್ಮನಿಗಿಂತ 10 ಪಟ್ಟು ಹೆಚ್ಚಾಗಿದ್ದು, ಭಾರತಕ್ಕಿಂತ 50 ಪಟ್ಟು ಹೆಚ್ಚಾಗಿದೆ. ಆಂತರಿಕ ಯುದ್ಧ ನಡೆಯುತ್ತಿರುವ ದೇಶಗಳನ್ನು ಬಿಟ್ಟರೆ ಜಗತ್ತಿನಲ್ಲೇ ಅತಿ ಹೆಚ್ಚು.  ಆರ್ಥಿಕವಾಗಿ ಅಭಿವೃದ್ಧಿ ಹೊಂದಿರುವ ರಾಷ್ಟ್ರಗಳ ಪೈಕಿ ಅಮೆರಿಕವು ಅತಿ `ಹೆಚ್ಚು ಹಿಂಸಾಚಾರದಿಂದ ಕೂಡಿದ’ ರಾಷ್ಟ್ರವೆಂದು ಪರಿಗಣಿಸಲ್ಪಡುತ್ತದೆ. ಇದಲ್ಲದೆ, ಯಾವುದೇ ಒಂದು ದೇಶಕ್ಕಿಂತಲು ಹೆಚ್ಚಿನ ಸಂಖ್ಯೆಯ ತಲಾ ಬಂದೂಕುಗಳನ್ನು ಹೊಂದಿರುವ ರಾಷ್ಟ್ರವೂ ಆಗಿದೆ. ಜಗತ್ತಿನ ಕೇವಲ ಶೇ. 4.4 ಜನಸಂಖ್ಯೆ ಹೊಂದಿರುವ ಅಮೆರಿಕದ ಜನ, ಜಗತ್ತಿನಲ್ಲಿ ನಾಗರಿಕರ ಬಳಿ ಇರುವ ಶಸ್ತ್ರಾಸ್ತ್ರಗಳ ಶೆ. 42ರಷ್ಟನ್ನು ಹೊಂದಿದ್ದಾರೆ.

ಲಾಸ್ ವೆಗಾಸ್ ಶೂಟಿಂಗ್ ಪ್ರಕರಣ ಬಂದೂಕು ತಯಾರಿ ಕಂಪನಿಗಳ ಶೇರು ಬೆಲೆ ಏರಿಕೆಗೆ ಕಾರಣವಾಗಿದೆ. ಒಂದು ಶೂಟೌಟ್ ಪ್ರಕರಣ ನಡೆದರೆ ಅಲ್ಲಿನ ನಾಗರೀಕರು ಹೆಚ್ಚು-ಹೆಚ್ಚು ವಿಧ-ವಿಧವಾದ ಬಂದೂಕುಗಳನ್ನು ಖರೀದಿಸಲು ಮುಂದಾಗುತ್ತಾರಂತೆ. ಆಕ್ರಮಣಕಾರಿ ಬಂದೂಕುಗಳು ಮತ್ತು ಅರೆ ಸ್ವಯಂ-ಚಾಲಿತ ಬಂದೂಕುಗಳನ್ನು ನಾಗರೀಕರು ಖರೀದಿಸುವುದು ಏಕೆ ಎಂಬುದು ಕನಿಷ್ಟ ಇತರ ದೇಶಗಳವರಿಗೆ ಅರ್ಥವಾಗದ ವಿಷಯ.

ಸ್ಟಿಪನ್ ಪ್ಯಾಡಕ್ ಸುಮಾರು ಸಾವಿರ ಗುಂಡುಗಳನ್ನು 9 ರಿಂದ 11 ನಿಮಿಷಗಳ ಕಾಲಾವಧಿಯಲ್ಲಿ ಹಾರಿಸಲು ಸಾಧ್ಯವಾಯಿತೆಂದರೆ, ಅವನು ಅಕ್ರಮವಾಗಿ ಸ್ವಯಂ-ಚಾಲಿತ ಶಸ್ತ್ರಾಸ್ತ್ರಗಳನ್ನು ಹೊಂದಿದ್ದ ಎಂದು ಗೊತ್ತಾಗಿದೆ. 1986 ಕ್ಕಿಂತ ಮುಂಚೆ ಅವುಗಳ ಮೇಲೆ ಬಿಗಿಯಾದ ನಿಬಂಧನೆಗಳನ್ನು ಹೊಂದಿತ್ತು. ಆದಾಗ್ಯೂ, ಅರೆ-ಸ್ವಯಂ ಚಾಲಿತ ಶಸ್ತ್ರಾಸ್ತ್ರಗಳನ್ನು ಸರಳ ಸೇರ್ಪಡೆಗಳೊಂದಿಗೆ ಸಂಪೂರ್ಣ ಚಾಲಿತ ಬಂದೂಕಾಗಿ ಬದಲಾಯಿಸಲು ಇದೀಗ ನಿಯಂತ್ರಣಗಳನ್ನು ಸಡಿಲಿಸಲಾದ ಕಾರಣ, ನಾಗರಿಕರು ಈ ಬಂದೂಕು ಹೊಂದಲು ಸಾಧ್ಯವಾಗಿದೆ ಎಂದೆನಿಸುತ್ತದೆ. ಬಂಪ್-ಸ್ಟಾಕ್ ಎಂದು ಕರೆಯಲ್ಪಡುವ ಸಾಧನಗಳಿಂದ ಅರೆ-ಸ್ವಯಂ ಚಾಲಿತ ಗನ್ ಗಳನ್ನು ಸ್ವಯಂ ಚಾಲಿತ ಗನ್ ಆಗಿ ಪರಿವರ್ತಿಸಬಹುದು. ಇಲ್ಲಿ ಗುಂಡು ಹಾರಿಸುವ ವ್ಯಕ್ತಿಯು ಒಮ್ಮೆ ಮಾತ್ರ ಟ್ರಿಗರನ್ನು ಎಳೆಯುತ್ತಾನೆ. ಅಂತಹ ಒಂದು ಸಾಧನದೊಂದಿಗೆ ಸುಮಾರು 100 ಗುಂಡುಗಳನ್ನು ನಿಯತಕಾಲಿಗಳು 12-15 ಸೆಕೆಂಡುಗಳಲ್ಲಿ ಹೊಡೆಯುತ್ತವೆ.

ಪ್ಯಾಡಕ್ ತನ್ನ ಹೋಟೆಲ್ ಕೋಣೆಯಲ್ಲಿ ಇಂತಹ 23 ಆಯುಧಗಳನ್ನು ಹೊಂದಿದ್ದು ಕೆಲವು ಅಂತಹ ಬಂಪ್-ಸ್ಟಾಕ್ ಗಳೊಂದಿಗೆ ಅಳವಡಿಸಲಾಗಿದ್ದವು ಎಂದು ವರದಿಯಾಗಿದೆ. 22,000 ಜನರು ಪ್ಯಾಕ್ ಆಗಿದ್ದ ಪ್ರೇಕ್ಷಕರ ಕಡೆ ಗುಂಡು ಹಾರಿಸಿದ್ದು, ಅವನು ಯಾವುದೇ ನಿರ್ದಿಷ್ಟ ಗುರಿ ಹೊಂದಿರಲಿಲ್ಲ. ಟ್ರಿಗರನ್ನು ಎಳೆದಿರುತ್ತಾನೆ ಅಷ್ಟೇ, ಉಳಿದಂತೆ ಬಂದೂಕು ಎಲ್ಲ ಕಾರ್ಯವನ್ನೂ ನಿರ್ವಹಿಸಿರುತ್ತದೆ. ನಿರಂತರವಾಗಿ ಗುಂಡಿನ ಸುರಿಮಳೆಯಾಗುತ್ತದೆ. ಇದು 59 ಮಂದಿಯನ್ನೂ ಬಲಿ ತೆಗೆದುಕೊಂಡಿದೆ. ಉಳಿದಂತೆ ಕಾಲ್ತುಳಿತದಿಂದಾಗಿ 527 ಮಂದಿಗಿಂತ ಹೆಚ್ಚು ಗಾಯಾಳಾಗಿದ್ದಾರೆ.

ಈಗಾಗಲೇ ಹೇಳಿದ ಹಾಗೆ ಗನ್-ಒಡೆತನದ ಪರ ವಾದ ಮಾಡುವವರು ಜನಾಂಗೀಯ ಮತ್ತು ಬಿಳಿಯರ-ಅಧಿಪತ್ಯದ ಸಿದ್ಧಾಂತಕ್ಕೆ ಬೆಂಬಲಿಸುವವರು. ಇಂತಹವರ ಬೆಂಬಲದಿಂದಲೇ ಟ್ರಂಪ್ ಅಧಿಕಾರಕ್ಕೆ ಬಂದಿರುವುದು. ಮೈಕೇಲ್ ಮೂರ್ ಶೂಟೌಟ್ ಹಿಂಸಾಚಾರದ ಬಗ್ಗೆ ಮಾಡಿದ ಫಿಲಂನಲ್ಲಿ, ಇದರ ಹಿಂದೆ ಇರುವುದು ಬರಿಯ ಸುಲಭವಾಗಿ ಸಿಗುವ ಗನ್ ಮಾತ್ರವಲ್ಲ.  ಕರಿಯರಿಗೆ ಸಿಕ್ಕಿದ ನಾಗರಿಕ ಹಕ್ಕುಗಳಿಗೆ ಇರುವ ಹಿಂಸಾತ್ಮಕ ವಿರೋಧ ಎನ್ನುತ್ತಾರೆ.

ಈ ಶೂಟೌಟ್ ನಿಂದಾಗಿ ಉದ್ಭವಗೊಂಡಿರುವ ಪ್ರಶ್ನೆಗಳಿಗೆ ಅಮೆರಿಕದ ಆಡಳಿತದಿಂದ ಸರಿಯಾದ ಉತ್ತರ ಮಾತ್ರ ಸಿಗುವುದಿಲ್ಲ. ಏಕೆಂದರೆ, ವಿದೇಶಗಳಲ್ಲಿ ಬೇಕಾಬಿಟ್ಟಿ ಮಿಲಿಟರಿ ದಾಳಿ ಮಾಡಿ ನಾಶ ಮಾಡುವ ಮಾನಸಿಕತೆ ಆ ದೇಶದ ಜನರನ್ನು ಅದು ತಟ್ಟದೆ ಇದ್ದೀತೇ? ಅಮೆರಿಕದ ಆಕ್ರಮಣಗಳಿಗೆ ತುತ್ತಾದ ಹಲವು ರಾಷ್ಟ್ರಗಳು ನಮ್ಮ ಕಣ್ಮುಂದೆ ಇವೆ. ಗ್ರಾಮಗಳಲ್ಲಿನ ಜನರ ರಕ್ಷಣೆ ಮಾಡುವ ನೆಪದಲ್ಲಿ, ತಮ್ಮ ಸೈನಿಕರು ಕೊಂದ ಜನರ ಸಂಖ್ಯೆಗೆ ಲೆಕ್ಕವೇ ಇಲ್ಲವೆಂದು ಅದಕ್ಕೆ ಗೊತ್ತಿದೆ.

ಇರಾಕ್, ಇರಾನ್, ಲಿಬಿಯಾ, ಸಿರಿಯಾ ಹೀಗೆ ಹೆಸರಿಸಿದರೆ ಇನ್ನು ಹತ್ತಾರು ದೇಶಗಳು ಇಂತಹ ಆಕ್ರಮಣಗಳಿಗೆ ತುತ್ತಾಗಿವೆ. ಮೊಸುಲ್ ಅಥವಾ ರಾಖ್ಖದ ಬಹುತೇಕ ಪ್ರದೇಶಗಳನ್ನು ಮಿಲಿಟರಿ ಬಾಂಬುಗಳಿಂದ ನಾಶಗೊಳಿಸಲಾಗಿದೆ. ಇವೆಲ್ಲಾ ದಾಳಿಗಳು ಮತ್ತು ಶೂಟೌಟ್  ಪ್ರಕರಣಗಳ ಹಿಂದಿರುವ ಮಾನಸಿಕತೆ (ಬೇಕಾಬಿಟ್ಟಿ ಆಕ್ರಮಣ, ಗುಂಪುಹತ್ಯೆ) ಎರಡೂ ಒಂದೇ ಅಲ್ಲವೇ?

ಒಬ್ಬ ವ್ಯಕ್ತಿಯ ರೋಗ ಲಕ್ಷಣಗಳು ನಮಗೆ ಅರ್ಥವಾಗದೆ ಇರಬಹುದು. ಸಂಖ್ಯಾಶಾಸ್ತ್ರೀಯವಾಗಿ ವ್ಯಕ್ತಿಗಳನ್ನು ವಿಶ್ಲೇಷಿಸಲು ಸಾಧ್ಯವಿಲ್ಲದಿರಬಹುದು. ಆದರೆ ಸಾಮೂಹಿಕವಾಗಿ ವಿಶ್ಲೇಷಣೆ ಮಾಡಿದಾಗ ಖಂಡಿತ ಸರಿಯಾಗಿ ಅರ್ಥಮಾಡಿಕೊಳ್ಳಬಹುದು. ಅಮೆರಿಕದ ಪ್ರಭುತ್ವ ವಿಶ್ವದಲ್ಲೇ ಮೊದಲ ಭಯೋತ್ಪಾದಕ ಮಾನಸಿಕತೆ ಹೊಂದಿದ ಪ್ರಭುತ್ವ. ಅದರ ಹಲವು ವಿದೇಶೀ ಯುದ್ಧಗಳಿಗೂ ಮತ್ತು ದೇಶೀಯ ಶೂಟೌಟ್ ಗಳಿಗೂ ಮಾನಸಿಕತೆಯಲ್ಲಿ ಯಾವ ವ್ಯತ್ಯಾಸವಿದೆ?
 

 

- ನಾಗರಾಜ ನಂಜುಂಡಯ್ಯ