Error message

  • Deprecated function: Methods with the same name as their class will not be constructors in a future version of PHP; views_display has a deprecated constructor in require_once() (line 3097 of /home/janashakthi/public_html/includes/bootstrap.inc).
  • Deprecated function: Methods with the same name as their class will not be constructors in a future version of PHP; views_many_to_one_helper has a deprecated constructor in require_once() (line 113 of /home/janashakthi/public_html/sites/all/modules/ctools/ctools.module).

ವಿಶ್ವವಿದ್ಯಾಲಯಗಳ ಸ್ವಾಯತ್ತತೆಗೆ ಭಂಗ ಬೇಡ

ಸಂಪುಟ: 
11
ಸಂಚಿಕೆ: 
26
Sunday, 18 June 2017

ಕರ್ನಾಟಕ ವಿಶ್ವವಿದ್ಯಾಲಯಗಳ ಕಾಯಿದೆ ೨೦೦೦ಕ್ಕೆ ಪ್ರಮುಖ ತಿದ್ದುಪಡಿಗಳನ್ನು ಮಾಡುವ ಮಸೂದೆಯನ್ನು ರಾಜ್ಯ ಸರಕಾರ ವಿಧಾನ ಸಭೆಯಲ್ಲಿ ಮಂಡಿಸಿದೆ. ನೇಮಕಾತಿ ಮತ್ತು ಆಡಳಿತದ ಹಲವು ಅಧಿಕಾರಗಳನ್ನು ವಿ.ವಿ.ಗಳಿಂದ ಕಿತ್ತು ಕೊಂಡು ಕೇಂದ್ರೀಕರಿಸುವ ದೂರಗಾಮಿ ಪರಿಣಾಮ ಬೀರುವ ಪ್ರಸ್ತಾವಗಳು ಮಸೂದೆಯಲ್ಲಿ ಇವೆ. ಇದನ್ನು ವಿ.ವಿ.ಗಳಲ್ಲಿ ವ್ಯಾಪಕವಾಗಿ ಹಬ್ಬಿರುವ ಭ್ರಷ್ಟಾಚಾರ ತಡೆಯಲು ಎಂದು ಹೇಳಲಾಗಿದೆ. ಈಗ ೮ ಪ್ರತ್ಯೇಕ ವಿ.ವಿ. ಕಾಯಿದೆಗಳಿವೆ. ತಿದ್ದುಪಡಿ ಮಾಡಿ ಮಂಡಿಸಲಾಗುತ್ತಿರುವ ಈ ಮಸೂದೆ ರಾಜ್ಯದ ಎಲ್ಲಾ ೧೭ ವಿ.ವಿ.ಗಳಿಗಾಗಿ ಒಂದು ಸಮಗ್ರ ಶಾಸನ ರಚಿಸುವುದಕ್ಕಾಗಿ ಮತ್ತು ಅಂಥ ವಿ.ವಿ.ಗಳನ್ನು ಸ್ಥಾಪಿಸುವಲ್ಲಿ ಜಾರಿಯಲ್ಲಿರುವ ಹಲವು ಅಧಿನಿಯಮಗಳನ್ನು ಬದಲಿಸಲು ಅವಕಾಶ ಕಲ್ಪಿಸುವುದಕ್ಕಾಗಿ ತರಲಾಗುತ್ತಿದೆ ಎಂದು ಉನ್ನತ ಶಿಕ್ಷಣ ಸಚಿವ ಬಸವರಾಜ ರಾಯರೆಡ್ಡಿ ಅವರು ತಿಳಿಸಿದ್ದಾರೆ.
 

ವಿ.ವಿ.ಗಳಿಗೆ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿಯನ್ನು  ನೇಮಕಾತಿ ಮಾಡಿಕೊಳ್ಳುವ  ಈಗಿರುವ ಸ್ವಾಯತ್ತ ಅಧಿಕಾರವನ್ನು ಬದಲಾವಣೆ ಮಾಡಿ ಕೇಂದ್ರೀಕೃತ ವ್ಯವಸ್ಥೆ ಜಾರಿಗೊಳಿಸಲು ಮಸೂದೆಯಲ್ಲಿ ಉದ್ದೇಶಿಸಲಾಗಿದೆ. ವಿವಿಗಳ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿಯನ್ನು ನೇಮಿಸಲು ಸರ್ಕಾರವೇ ಒಂದು ಸಾಮಾನ್ಯ ನೇಮಕಾತಿ ಮಂಡಳಿ ಸ್ಥಾಪಿಸುವ ಬಗ್ಗೆ ಪ್ರಸ್ತಾಪಿಸಲಾಗಿದೆ. ವಿಶ್ವವಿದ್ಯಾಲಯಗಳ ಬೋಧಕರನ್ನು ಇದುವರೆಗೆ ಅಯಾ ವಿಷಯ ತಜ್ಞರ ಸಮಿತಿ ಸಂದರ್ಶನ ನಡೆಸಿ, ಅರ್ಹರ ಹೆಸರನ್ನು ಸಿಂಡಿಕೇಟ್ ಸಭೆಗೆ ಶಿಫಾರಸು ಮಾಡುತ್ತಿತ್ತು. ಕೇಂದ್ರೀಕೃತ  ನೇಮಕಾತಿ ವ್ಯವಸ್ಥೆ ನಂತರ, ಇದಕ್ಕಾಗಿ ತಜ್ಞರ ಸಮಿತಿ ರಚನೆ ಮಾಡಲು ಮಸೂದೆಯಲ್ಲಿ ಅವಕಾಶ ಕಲ್ಪಿಸಲಾಗಿದೆ. ಯಾವ ವಿವಿಯಲ್ಲಿ ಎಷ್ಟು ಬೋಧಕರ ಅಗತ್ಯ ಇದೆ ಎಂಬುದನ್ನು ಸಂಬಂಧಪಟ್ಟ ವಿ.ವಿ.ಗಳು ಈ ಸಮಿತಿಗೆ ವರದಿ ಕಳುಹಿಸಬೇಕು. ನೇಮಕಾತಿಗಾಗಿ ರಚಿಸಲಾಗುವ ಈ ಕೇಂದ್ರೀಕೃತ ಸಮಿತಿಗೆ ಆ ವಿ.ವಿ. ಕುಲಪತಿಯೂ ಸದಸ್ಯರಾಗಿರುತ್ತಾರೆ.  ನೇಮಕಾತಿ ಉದ್ದೇಶಕ್ಕೆ ಸಿದ್ಧಪಡಿಸಲಾದ ವಿಷಯ ತಜ್ಞರ ಪಟ್ಟಿ ಉನ್ನತ ಶಿಕ್ಷಣ ಇಲಾಖೆಯಲ್ಲಿ ಇರುತ್ತದೆ. ಚೀಟಿ ಎತ್ತುವ ಮೂಲಕ  ಸಮಿತಿ ಸದಸ್ಯರ ಹೆಸರನ್ನು ಅಂತಿಮಗೊಳಿಸಲಾಗುತ್ತದಂತೆ.
ವಿ.ವಿ. ಕುಲಪತಿಗಳ ನೇಮಕದ ಶೋಧನಾ ಸಮಿತಿಯಲ್ಲೂ ಬದಲಾವಣೆ ಸೂಚಿಸಲಾಗಿದೆ. ಈ ಹಿಂದೆ ಯುಜಿಸಿ, ರಾಜ್ಯಪಾಲರು ಮತ್ತು ಸರ್ಕಾರದಿಂದ ಸೂಚಿತರಾದ ಮೂವರು ಸದಸ್ಯರಿರುತ್ತಿದ್ದರು. ಇದೀಗ ಆ ಸಂಖ್ಯೆಯನ್ನು ಐದಕ್ಕೆ ಏರಿಸಲು ಮುಂದಾಗಿರುವ ಸರ್ಕಾರ, ಸಮಿತಿಯಲ್ಲಿ ಒಬ್ಬ ಯುಜಿಸಿ, ಒಬ್ಬ ರಾಜ್ಯಪಾಲರು ಸೂಚಿಸಿದ ವ್ಯಕ್ತಿಗಳ ಜತೆಗೆ ಸರ್ಕಾರದ ಇಬ್ಬರು ಮತ್ತು ವಿವಿ ಸೂಚಿಸಿದ ಒಬ್ಬ ಪ್ರತಿನಿಧಿ ಇರಬೇಕು ಎಂದು ಹೇಳಿದೆ. ಕುಲಪತಿಯಾಗಿ ನೇಮಕಗೊಂಡವರು ನಾಲ್ಕು ವರ್ಷ - ಅವಧಿ ಇರಬೇಕು ಹಾಗೂ ೬೭ ವರ್ಷ ತಲುಪಿದ ಬಳಿಕ ನಿವೃತ್ತರಾಗಬೇಕು. ಎರಡನೇ ಅವಧಿಗೆ ಮರುನೇಮಕಕ್ಕೆ ಅವಕಾಶ ಇರುವುದಿಲ್ಲ ಎಂದು ಹೇಳಲಾಗಿದೆ.

 

ವಿಶ್ವವಿದ್ಯಾಲಯವು ಕಾರ್ಯನಿರ್ವಾಹಕ ಪರಿಷತ್ ಮೂಲಕ ತನ್ನ ಪ್ರತಿನಿಧಿಯನ್ನು ಸೂಚಿಸುತ್ತದೆ. ಈ ಪರಿಷತ್ತಿನಲ್ಲಿ ಸರ್ಕಾರದಿಂದ ನಾಮನಿರ್ದೇಶನಗೊಂಡವರೇ ಹೆಚ್ಚಿನ ಸಂಖ್ಯೆಯಲ್ಲಿರುವುದರಿಂದ ಈ ವ್ಯಕ್ತಿಯೂ ಸರ್ಕಾರದ ಪರವಾಗಿರುತ್ತಾನೆ. ಆಗ ಸರ್ಕಾರ ನಿರ್ಧರಿಸಿದವರೇ ಕುಲಪತಿ ಹುದ್ದೆಗೆ ಆಯ್ಕೆಯಾಗುವ ಸಾಧ್ಯತೆ ಹೆಚ್ಚಾಗಿದೆ. ಶೋಧನಾ ಸಮಿತಿಯಲ್ಲಿ ಕುಲಪತಿಗಳು, ಮಾಜಿ ಕುಲಪತಿಗಳು, ರಾಷ್ಟ್ರೀಯ ಪ್ರಾಮುಖ್ಯತೆಯ ಸಂಸ್ಥೆಗಳ ನಿರ್ದೇಶಕರ ದರ್ಜೆಗೆ ಕಡಿಮೆ ಇಲ್ಲದ ಪ್ರಸಿದ್ಧ ಶಿಕ್ಷಣ ತಜ್ಞರು ಮಾತ್ರ ಇರುತ್ತಾರೆ ಎನ್ನುವ ಮೂಲಕ ಸರ್ಕಾರ ತನ್ನ ಈ ನಿರ್ಧಾರವನ್ನು ಸಮರ್ಥಿಸಿಕೊಳ್ಳುವ ಪ್ರಯತ್ನ ಮಾಡುತ್ತಿದೆ. ವಿ.ವಿ, ಕುಲಪತಿ ದೀರ್ಘ ರಜೆ ಅಥವಾ ಪ್ರವಾಸ ಹೋದಾಗ, ಈಗಿನ ಪದ್ಧತಿಯಂತೆ ವಿ.ವಿ.ಯ ಹಿರಿಯ ಪ್ರೊಫೆಸರ್ ಇನ್-ಚಾರ್ಜ್ ಕುಲಪತಿ ಆಗಿರುವುದಿಲ್ಲ. ಇನ್ನೊಂದು ವಿ.ವಿ.ಯ ಕುಲಪತಿ ಅಧಿಕಾರ ವಹಿಸಿಕೊಳ್ಳಬೇಕಂತೆ!
 

ಕುಲಸಚಿವರ ನೇಮಕವನ್ನೂ ಸರ್ಕಾರ ತನ್ನ ಹಿಡಿತಕ್ಕೆ ತೆಗೆದುಕೊಳ್ಳಲಿದೆ. ಪ್ರಸ್ತುತ ರಾಜ್ಯಪಾಲರು ಕುಲಸಚಿವರನ್ನು ನೇಮಕ ಮಾಡುತ್ತಾರೆ. ಅಲ್ಲದೆ ಹಿರಿಯ ಬೋಧಕ ಸಿಬ್ಬಂದಿಯಿಂದಲೇ ಕುಲಸಚಿವರನ್ನು ಆರಿಸಲಾಗುತ್ತಿತ್ತು. ಆದರೆ  ಮಸೂದೆಯಲ್ಲಿ ಐಎಎಸ್ ಮತ್ತು ಕೆಎಎಸ್ ಹಿರಿಯ ಶ್ರೇಣಿ ಅಧಿಕಾರಿಗಳು ಕುಲಸಚಿವರಾಗಬೇಕು ಎಂದು ಹೇಳುತ್ತದೆ.
 

ವಿ.ವಿ.ಗಳಲ್ಲಿ ಕೈಗೊಳ್ಳುವ ಕಾಮಗಾರಿಗೆ ಸಂಬಂಧಿಸಿದಂತೆ ಉನ್ನತ ಶಿಕ್ಷಣ ಸಚಿವರ ನೇತೃತ್ವದಲ್ಲಿ ಮೂಲ ಸೌಕರ್ಯ ಅಭಿವೃದ್ಧಿ ಮಂಡಳಿ ರಚಿಸಲಾಗುತ್ತದೆ. ಒಂದು ಕೋಟಿ ರೂಪಾಯಿಗಿಂತ ಅಧಿಕ ಮೊತ್ತದ ಕಾಮಗಾರಿ ನಡೆಸಲು ಈ ಮಂಡಳಿಯ ಅನುಮತಿ ಪಡೆದುಕೊಳ್ಳಬೇಕಾಗುತ್ತದೆ. ವಿಶ್ವವಿದ್ಯಾಲಯದಲ್ಲಿ ರೂ. ೧೦ ಕೋಟಿಗೂ ಅಧಿಕ ಮೊತ್ತದ ಕಾಮಗಾರಿ ಕೈಗೊಳ್ಳಬೇಕಾದರೆ ಸಂಪುಟ ಸಭೆಯ ಅನುಮೋದನೆ ಪಡೆಯಬೇಕಾಗುತ್ತದೆ. ಅಂದರೆ, ಅಲ್ಲೂ ಸರ್ಕಾರ ಮಧ್ಯಪ್ರವೇಶಿಸಿದಂತಾಗುತ್ತದೆ. ಜತೆಗೆ ವಿಶ್ವವಿದ್ಯಾಲಯದ ಯಾವುದೇ ಆದೇಶ, ಅಧಿಸೂಚನೆ, ನಿರ್ಣಯ ಅಥವಾ ಯಾವುದೇ ವ್ಯವಹಾರ ನಿಯಮಗಳ ಅನುಸಾರ ಇಲ್ಲ ಅಥವಾ ರಾಜ್ಯ ಸರ್ಕಾರದ ಕಾರ್ಯನೀತಿಗೆ ವಿರುದ್ಧವಾಗಿದೆ ಎಂದಾದರೆ ಸರ್ಕಾರಿ ರಾಜ್ಯಪತ್ರದಲ್ಲಿ ಆದೇಶ ಪ್ರಕಟಿಸಿ ವಿ.ವಿ.ಯ ತೀರ್ಮಾನವನ್ನು ರದ್ದುಗೊಳಿಸಬಹುದಾದ ಅಧಿಕಾರವನ್ನು ಸರ್ಕಾರ ತಾನೇ ಇಟ್ಟುಕೊಳ್ಳಲು ಮುಂದಾಗಿದೆ.
 

ವಿಶ್ವವಿದ್ಯಾಲಯದ ಆಗುಹೋಗುಗಳಲ್ಲಿ ರಾಜ್ಯಪಾಲರ ಅಧಿಕಾರವನ್ನು ಮೊಟಕು ಗೊಳಿಸುವುದರ ಜತೆಗೆ, ಅಕಾಡೆಮಿಕ್ ಕೌನ್ಸಿಲ್ಗೆ ವಿಧಾನಸಭೆ ಮತ್ತು ವಿಧಾನ ಪರಿಷತ್ ಸದಸ್ಯರನ್ನು ನಾಮನಿರ್ದೇಶನ ಮಾಡುವುದರ ಬದಲು, ಸರ್ಕಾರ ನಾಮನಿರ್ದೇಶನ ಮಾಡಲಿದೆ. ಇದು ಸಾಕಷ್ಟು ವಿವಾದಾಸ್ಪದವಾಗಲಿದೆ.
 

ಇವೆಲ್ಲ ಬದಲಾವಣೆಗಳ (ಅಥವಾ ಕೇಂದ್ರೀಕರಣಗಳ ಮತ್ತು ಅಧಿಕಾರಶಾಹೀಕರಣ ಎಂದರೆ ಹೆಚ್ಚು ಸರಿಯಾದೀತು) ಒಟ್ಟು ಪರಿಣಾಮವೆಂದರೆ ವಿ.ವಿ.ಯನ್ನು ಸರಕಾರದ ಉನ್ನತ ಶಿಕ್ಷಣ ಸಚಿವಾಲಯದ ಒಂದು ಇಲಾಖೆಯಂತೆ ನಡೆಸಲು ಹೊರಟಿದೆ.  ವಿ.ವಿ.ಯ ಸ್ವಾಯತ್ತತೆ ಹೆಚ್ಚು ಕಡಿಮೆ ಪೂರ್ಣವಾಗಿ ಮಾಯವಾಗಿರುತ್ತದೆ. ವಿ.ವಿಯಲ್ಲಿ ಈಗ ಬೋಧಕ ಮತ್ತು ಬೋಧಕೇತರ ಸಿಬ್ಬಂದಿಗಳ ನೇಮಕಾತಿಯಲ್ಲಿ ಭ್ರಷ್ಟಾಚಾರ ತಾಂಡವವಾಡುತ್ತಿದೆ. ಸಿಬ್ಬಂದಿಯ ಗುಣಮಟ್ಟ ಸಹ ಕಳಪೆಯಾಗಿದೆ, ಎಂಬುದು ನಿಜ. ಕಾಮಗಾರಿಗಳಲ್ಲೂ ಭಾರಿ ಪ್ರಮಾಣದ ಭ್ರಷ್ಟಾಚಾರ ನಡೆಯುತ್ತಿದೆ. ಆದರೆ ಕೇಂದ್ರೀಕರಣ ಇದಕ್ಕೆ ಪರಿಹಾರವೇ? ಈಗ ಕೇಂದ್ರೀಕೃತವಾಗಿ ನಡೆಯುತ್ತಿರುವ ಕುಲಪತಿಗಳ ನೇಮಕಾತಿಯಲ್ಲಿ ಅತ್ಯಂತ ಉನ್ನತ ಮಟ್ಟದಲ್ಲಿ ಭ್ರಷ್ಟಾಚಾರ ನಡೆಯುತ್ತಿಲ್ಲವೇ? ವಿ.ವಿ.ಗಳಲ್ಲಿ ಕೆಳಗಿನ ಹಂತಗಳ ನೇಮಕಾತಿ ಹಾಗೂ ಕಾಮಗಾರಿಗಳಲ್ಲಿ ನಡೆಯುತ್ತಿರುವ ಭ್ರಷ್ಟಾಚಾರಕ್ಕೆ ಇದು ಮೂಲವೂ ಆಗಿರುವ ಸಾಧ್ಯೆತೆ ಇದೆ. ಅತ್ಯಂತ ಕೇಂದ್ರೀಕೃತವಾಗಿ ನೇಮಕಾತಿ ನಡೆಸುವ ಕೆ.ಪಿ.ಎಸ್.ಸಿ. ಯಲ್ಲಿ ಅತ್ಯಂತ ಹೆಚ್ಚು ಭ್ರಷ್ಟಾಚಾರ ಇಲ್ಲವೇ? ಐಎಎಸ್ ಮತ್ತು ಕೆಎಎಸ್ ಅಧಿಕಾರಿಗಳಲ್ಲಿ ಭ್ರಷ್ಟಾಚಾರ, ಕಾರ್ಯ ನಿರ್ವಹಣೆಯ ಕಳಪೆ ಗುಣಮಟ್ಟ ಇಲ್ಲವೇ? ಆಧ್ದರಿಂದ ಈ ಕೇಂದ್ರೀಕರಣಗಳ ಬದಲಾವಣೆಗಳು ಭ್ರಷ್ಟಾಚಾರ ಮತ್ತು ಕಳಪೆ ಗುಣಮಟ್ಟಕ್ಕೆ ಪರಿಹಾರ ಆಗಲಾರವು. ವಿ.ವಿ,ಯ ಸ್ವಾಯತ್ತತೆಗೆ ಭಂಗ ತರುವುದಲ್ಲದೆ, ತೀವ್ರ ಬರಡು ಅಧಿಕಾರಶಾಹಿಕರಣವನ್ನೂ ಮಾಡಲಿದೆ.
 

ಸಮಾಜದ ಸೃಜನಾತ್ಮಕ ಯೋಚನೆಗಳ ಹುಟ್ಟುತಾಣವಾಗಬೇಕಾದ ವಿಶ್ವವಿದ್ಯಾಲಯಗಳ ಸ್ವಾಯತ್ತ ತೆಯ ಹರಣ ಮಾಡುವ ಮತ್ತು ಬರಡು ಅಧಿಕಾರಶಾಹಿಕರಣಗೊಳಿಸುವ ಈ ತಿದ್ದುಪಡಿಗಳನ್ನು ಸರಕಾರ ತಕ್ಷಣ ಹಿಂತೆಗೆದುಕೊಳ್ಳಬೇಕು.